
第一世噶玛巴教言集1KM17བདེ་མཆོག་ལྷ་ལྔའི་དབང་གི་ཆོ་ག་ནོར་བུའི་ཕྲེང་བ་བཞུགས་སོ། །
1-2-157a
༄༅། །བདེ་མཆོག་ལྷ་ལྔའི་དབང་གི་ཆོ་ག་ནོར་བུའི་ཕྲེང་བ་བཞུགས་སོ། །
༄༅། །བདེ་མཆོག་ལྷ་ལྔའི་དབང་གི་ཆོ་ག་ནོར་བུའི་ཕྲེང་བ་བཞུགས་སོ། །བཅོམ་ལྡན་འདས་དཔལ་འཁོར་ལོ་བདེ་མཆོག་ལ་ཕྱག་འཚལ་ལོ། །འདིར་དཔལ་ནཱ་རོ་པའི་ཐུགས་དམ། དཔལ་འཁོར་ལོ་སྡོམ་པའི་རྩ་བ་དང་བཤད་པའི་རྒྱུད་ཀྱི་སྙིང་པོར་གྱུར་པ། བདེ་མཆོག་ལྷ་ལྔའི་དབང་བསྐུར་བའི་རིམ་པ་ལས། ཐོག་མར་མ་སྨིན་པ་སྨིན་པར་བྱེད་པའི་དབང་བཞི་རྫོགས་པར་གདན་གཅིག་ཏུ་བསྐུར་བ་ནི། སློབ་དཔོན་མཚན་ཉིད་དང་ལྡན་པ་གཅིག་ལ། སློབ་མས་དབང་བསྐུར་བར་ཞུ་ཞེས་གསོལ་བ་གདབ། སློབ་དཔོན་གྱིས་རིགས་བརྟགས་ལ། སྣོད་དུ་རུང་ན་ཡི་གེ་བདུན་པ་ལ་བསྙེན་པ་ཅི་རིགས་པ་བྱས་ལ། དེ་ཡང་དམ་རྫས་ཀླུ ཚང་ཞིང་བསྙེན་པ་རྫོགས་པ་དང་། བཅུ་གཉིས་གང་ཡང་རུང་བ་ལ་ཡིད་དང་འཐུན་པའི་གནས་སུ་ཕྱག་དར་དང་བྱི་དོར་ལེགས་པར་བྱས་ལ། མཎྜལ་བ་ཡི་རྣམ་ལྔ་དང་བདུད་རྩི་ལྔས་བྱུགས་ལ། མེ་རི་རྡོ་རྗེ་དུར་ཁྲོད་དང་བཅས་པའི་དབུས་སུ། པདྨ་འདབ་བརྒྱད་ལྟེ་བ་ལ་ཧཱུྃ་དང་བཅས་པ་བྲི། ཡང་ན་དབང་པོ་ཡང་རབ་ཡིན་ན་མེ་ཏོག་གི་ཚོམ་བུ་ལྔ་བཀོད་དོ། །དེ་ནས་བུམ་པ་མཚན་ཉིད་དང་ལྡན་པ་ལེགས་པར་བཀྲུ་བར་བྱ་སྟེ། གུ་གུལ་གྱི་དུད་པས་བདུག །བགེགས་བསྲེག །མགུལ་ཆིངས་སྲོག་ལྔ་པ་བྱས་ལ་ལྔ་ཚན་ཉི་ཤུ་རྩ་ལྔ་ནང་དུ་བླུག །འབྲས་བུ་ཅན་གྱི་ཤིང་གིས་ཁ་བརྒྱན་ལ་དཀྱིལ་འཁོར་གྱི་དབུས་སུ་མ་འཇིའི་
1-2-157b
ཁར་བཞག་པའམ། གང་བདེར་བཞག་གོ །ལས་བུམ་གཞན་དང་འདྲི་བར་བྱང་ཤར་མཚམས་སུ་བཞག་གོ །པཱུ་ཛ་བཅུ་བས་མི་ཉུང་བ་ཅི་འབྱོར་པས་མཐའ་མ་བསྐོར། གཏོར་མ་ལྔ་ལས་བཞི་མཚམས་བཞིར་བཞག ༑གཙོ་བོ་གང་བདེར་བཞག་གོ །དེ་ནས་དབང་ཐོབ་པའི་དཔའ་བོ་ལྷ་གྲངས་དང་མཉམ་པ་གྲལ་རིམ་གྱིས་འཁོད་ལ། ཡི་གེ་བརྒྱ་པས་རྒྱུད་སྦྱངས། བགེགས་གཏོར་བཏང་། མཚམས་བཅད། བསྲུང་བའི་འཁོར་ལོ་བསྒོམ། ཡན་ལག་བདུན་པ་བྱ། དེ་ནས་སེམས་བསྐྱེད་པ་སྔོན་དུ་སོང་བས། རང་སྐད་ཅིག་གིས་སྒྲུབ་ཐབས་ནས་འབྱུང་བ་བཞིན་དུ་བསྐྱེད་ལ། ཡེ་ཤེས་པ་བསྟིམ། དབང་བསྐུར། བདག་ལྷར་གསལ་བ་ལ་ཕྱི་ནང་གསང་གསུམ་གྱི་མཆོད་པ་འབུལ། བསྟོད་པ་བྱ། བསྙེན་པ་ཅི་རིགས་པ་བསྐྱེལ་ལོ། །དེ་ནས་མཎྜལ་སྟོང་པའི་ངང་ལས། ཧཱུྃ་ལས་གཞལ་ཡས་ཁང་གྲུ་བཞི་པ། རྟ་བབས། དུར་ཁྲོད། རྡོ་རྗེ། མེ་རི་དང་བཅས་པ་བསྒོམ། དེ་ནི་དབང་པོ་ཡང་རབ་ཀྱི་ལུགས་ཡིན་པས་རིམ་བརྩེགས་མི་དགོས་སོ། །དེའི་དབུས་སུ་པཾ་ལས་པདྨ། རཾ་ལས་ཉི་མ། དེའི་སྟེང་དུ་ཧཱུཾ་སྔོན་པོ་ལས་འོད་ཟེར་འཕྲོས་པས། དེས་བསྐུལ༑ དོན་གཉིས་བྱས་ལ། དེ་ཡོངས་སུ་གྱུར་པ་ལས་བདེ་མཆོག་ལྷ་ལྔ་བསྐྱེད། རང་དང་མཎྜལ་གྱི་ཐུགས་ཀ་ནས་འོད་ཟེར་འཕྲོས་པས་ཡེ་ཤེས་པ་སྤྱན་དྲངས་ལ་མཆོད་དེ་གཉིས་སུ་མེད་པར་བསྟིམ། 
1-2-158a
༄༅། །དབང་བསྐུར། ཕྱི་ནང་གསང་གསུམ་གྱི་མཆོད་པ་འབུལ། བསྟོད་པ་བྱའོ། །དེ་ནས་ཡི་གེ་བདུན་པ་ཅི་རིགས་པ་བཟླས་པ་ནི། སྔགས་ཀྱི་མཆོད་པ་དང་། བསྙེན་པ་ཐབས་གཅིག་ཏུ་བྱེད་པའོ། །དེ་ནས་བུམ་པ་བསྒྲུབ་པ་ནི། བུམ་པའི་བགེགས་བསྐྲད། སྟོང་པའི་ངང་ལས་ཧཱུྃ་ལས་རིན་པོ་ཆེའི་གཞལ་ཡས་ཁང་དུ་བསྐྱེད། དེའི་ནང་དུ་པཾ་ལས་པདྨ་རཾ་ལས་ཉི་མའི་སྟེང་དུ་ཧཱུཾ་སྔོན་པོ་གཅིག་བསམ། དེ་ལས་འོད་ཟེར་འཕྲོས། སེམས་ཅན་གྱི་དོན་བྱས། ཚུར་འདུས་ཏེ་ཧཱུཾ་ལ་ཐིམ། རྡོ་རྗེ་ཧཱུྃ་གིས་མཚན་པར་གྱུར། དེ་ལས་འོད་འཕྲོས། སངས་རྒྱས་མཆོད། ཐུགས་དམ་གྱི་རྒྱུད་བསྐུལ། མཐུ་བསྡུས་ཧཱུྃ་ལ་ཐིམ། རྡོ་རྗེ་ཧཱུྃ་དང་བཅས་པ་ཡོངས་སུ་གྱུར་པ་ལས། བདེ་མཆོག་ལྷ་ལྔ་བསྐྱེད། རང་དང་བུམ་པའི་ལྷའི་ཐུགས་ཀ་ནས་འོད་འཕྲོས། ཡེ་ཤེས་པ་སྤྱན་དྲངས་གཉིས་སུ་མེད་པར་བསྟིམ་ལ། ཕྱི་ནང་གསང་གསུམ་གྱི་མཆོད་པ་འབུལ༑ བསྟོད་པ་བྱ་ལ། དེ་ནས་སྔགས་བཟླས་པས། རང་གི་ཐུགས་ཀ་ནས་སྔགས་ཀྱི་འོད་ཟེར་གཟུང་ཐག་ལ་འབྲེལ་ནས་སོང་བས་བུམ་པའི་ལྷའི་ཐུགས་ཀར་ཐིམ་པས། ཡབ་ཡུམ་དགྱེས་པར་གྱུར་ནས་སྙོམས་འཇུག་བྱས་པས་བྱང་ཆུབ་ཀྱི་སེམས་དཀར་དམར་དང་། འོད་ཟེར་བ་སྤུའི་བུ་ག་ནས་འཕྲོས་པས་བུམ་པ་ཡེ་ཤེས་ཀྱི་བདུད་རྩིས་གང་བར་བསམ་མོ། །དེ་ནས་ལས་བུམ་ལ་བདུད་རྩི་འཁྱིལ་པ་བསྐྱེད་ལ་
1-2-158b
ཡེ་ཤེས་པ་བསྟིམ། དབང་བསྐུར། མཆོད་པ་འབུལ། བསྟོད་པ་བྱའོ། །དེ་ནས་བཟླས་པ་ཅི་རིགས་གཅིག་བྱས་ལ། བདུད་མི་འཇུག་པར་བར་ཆད་བསྲུངས་ཤིག་ཅེས་གསོལ་བ་གདབ་བོ། །དེ་ནས་ཚོགས་བྱིན་གྱིས་རླབས་ལ་གཏོར་མ་ལ་ཕུད་འབུལ། ཆང་ཕུད་ཀྱིས་བྲན་ལ། གཏོར་མའི་རིམ་པ་བཞིན་དུ་བསྔོའོ། །འདི་ཉིད་དུ། དེ་ནས་དཀྱིལ་འཁོར་བསྒྲུབ་པའོ། །དེ་ནས་དཀྱིལ་འཁོར་དུ་འཇུག་པ་ནི། སློབ་མ་རྣམས་ཁྲུས་བྱས་ལ། ཡོལ་བའི་ཕྱི་རོལ་དུ་བཞག །མཎྜལ་འབུལ། བླ་མ་ལ་ཕྱག་བྱས་ལ། ཕ་རོལ་ཏུ་ཕྱིན་པའི་སྐྱབས་འགྲོ་དང་སེམས་བསྐྱེད། བསླབ་བྱ་དང་བཅས་པ་འབུལ། སློབ་དཔོན་གྱིས་ངག་ཏུ། ཁྱོད་སུ་ཡིན་ཅི་ལ་དགའ། ཞེས་དྲིས་ལ། སློབ་མས། སྐལ་བཟང་བདག་བདེ་བ་ཆེན་པོ་ལ་དགའ་འོ། །ཞེས་ལན་གདབ་བོ། །དེ་ནས་སློབ་དཔོན་གྱིས་ལས་བུམ་དང་གདོང་རས་མེ་ཏོག་གི་ཕྲེང་བ་ཁྱེར་ལ། ལས་བུམ་གྱི་ཆུ་སྤྱི་བོར་བླུག་ཅིང་འཐུང་དུ་གཞུག །སུམ་བྷ་ནིས་བགེགས་བསྐྲད། དེ་ནས་གདོང་དར་བཅིངས་ལ། ཨ་ཁཾ་བི་ར་ཧཱུཾ། ཞེས་བརྗོད་ལ་མེ་ཏོག་གི་ཕྲེང་བ་གཏད། དེ་ནས་སློབ་དཔོན་ཧེ་རུ་ཀར་བསྒོམ། ནམ་མཁའ་ལ་ཡང་བདེ་མཆོག་གི་ལྷ་ཚོགས་བསྒོམ་དུ་བཅུག་ལ། དེ་རྣམས་ལ་ཕྱག་བྱས་ཏེ། འཇུག་པའི་ཡོན་ཕུལ་ལ་གསོལ་བ་གདབ་པ་ནི། དགའ་ཆེན་ཁྱོད་བདག་སྟོན་པ་ཡི། །སློབ་དཔོན་ཁྱོད་ནི་དགོངས་སུ་
1-2-159a
༄༅། །གསོལ། །བྱང་ཆུབ་ཆེན་པོའི་ཚུལ་བསྟན་པ། །དམ་ཚིག་དེ་ནི་རྩལ་དུ་གསོལ། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་ཀྱང་བདག་ལ་རྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཞེས་ལན་གསུམ་གསོལ་བ་གདབ་བོ། །དེ་ནས་གནང་བ་སྦྱིན་པ་ནི། བུ་ཚུར་ཐེག་པ་ཆེན་པོ་ཡི། ཁྱོད་ནི་ཚུལ་ཆེན་སྣོད་ཡིན་པས། །གསང་སྔགས་སྤྱོད་ཚུལ་ཆོ་ག་ནི༑ ༑ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་དག་དང་། །གང་དག་འདས་དང་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་པས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པའི་མཚན་མ་བརྙེས། །གསང་སྔགས་སྤྱོད་པ་མཉམ་མེད་པས། །སྐྱོབ་པ་སངས་རྒྱས་ཧེ་རུ་ཀས༑ ༑བདུད་སྡེ་ཤིན་ཏུ་མི་ཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད། དེའི་དོན་ཡང་དག་པར་བཤད་དོ། །དེ་ནས་སློབ་མ་རྣ་བ་གཏད་པའི་ཕྱིར་བསྐུལ་བ་ནི། རྟོག་པ་མ་ལུས་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོས་ལེགས་པར་ཉོན། །བརྗེད་ངས་བློ་ལ་ཧེ་རུ་ཀ་སོགས་པའི། །བདེ་བར་གཤེགས་པ་རྣམས་ཀྱིས་
1-2-159b
བྱིན་མི་བརླབས། །ཞེས་པས་རྩེ་གཅིག་པར་ཉོན་ཅིག་ཅེས་བསྐུལ་ལོ། །དེ་ནས་བདུན་རྣམ་དག་གིས་ཚོགས་བསག་པ་ནི། བདག་གིས་སྡིག་པ་བགྱིས་པ་དང་། །བགྱིད་དུ་སྩལ་དང་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །དེ་དག་བདག་གིས་བཤགས་པར་བགྱི། །སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་དགྲ་བཅོམ་འགྲོ་རྣམས་ཀྱི། །བསྒོམ་དང་བཟླས་བརྗོད་བསོད་ནམས་ལ། །དེ་ལ་བདག་ནི་ཡི་རང་ངོ་། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་བསྐོར་བ་དང་། །བྱང་ཆུབ་སེམས་ནི་ཚོགས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཅི་ལྟ་བ། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་དུ་ནི་སེམས་བསྐྱེད་ལྟར། །འདི་ཉིད་དུ་ནི་སེམས་བསྐྱེད་དོ། །བདག་གི་དགེ་བའི་ལས་ནི་འདི་དག་གིས། །འཇིག་རྟེན་འདི ར་ནི་མྱུར་དུ་སངས་རྒྱས་ཤིང་། །འགྲོ་ལ་ཕན་ཕྱིར་ཆོས་རྣམས་སྟོན་བགྱིས་ནས། །སེམས་ཅན་སྡུག་བསྔལ་མང་པོ་གཟིར་ལས་སྒྲོལ། །ཅེས་ལན་གསུམ་གྱིས་བསོད་ནམས་ཀྱི་ཚོགས་བསོག །དེ་ནས་སློབ་མ་སྟོང་པ་ཉིད་དུ་བྱས་ལ། ཧེ་རུ་ཀ་བསྒོམ་དུ་གཞུག །དེ་ནས་སློབ་མའི་སྙིང་གར་སློབ་དཔོན་གྱིས་རྡོ་རྗེ་བཞག་ལ། ས་མ་ཡ་ཧོ། ཞེས་བརྗོད་པས། སློབ་མའི་སྙིང་གར་ཟླ་བའི་དཀྱིལ་འཁོར་ཉ་གང་བ་གཅིག་བསྒོམ་དུ་གཞུག །སུ་སཱུ་ར་ཏེ་ས་མ་ཡ་སྟྭཾ་
1-2-160a
༄༅། །བཛྲ་ཡ་ཐ་སུ་ཁཾ་ཟེར་ར་སྟྭཾ་ཙཱ་ཞེས་བརྗོད་པའི་རྡོ་རྗེ་དཀར་པོ་རྩེ་ལྔ་པ་གཅིག་བསྒོམ་དུ་གཞུག །དེ་ཡང་ཟླ་བ་ནི་ཀུན་རྫོབ་བྱང་ཆུབ་ཀྱི་སེམས་མཚོན་པ་ཡིན་ལ། རྡོ་རྗེ་ནི་དོན་དམ་བྱང་ཆུབ་ཀྱི་སེམས་མཚོན་པའོ། །དེ་ནས་སློབ་མའི་གནས་གསུམ་དུ་དྲིའི་ཐིག་ལེ་རེ་རེ་བྱས་ལ། སྤྱི་བོར་ཟླ་བ་ལ་ཨོཾ། མགྲིན་པར་པདྨ་ལ་ཨཱཿ སྙིང་གར་ཉི་མ་ལ་ཧཱུྃ། དེ་གསུམ་ལས་འཁོར་ལོ་དང་། པདྨ་དང་། རྡོ་རྗེ་གསུམ་ལས་སླར་ཡི་གེ་གསུམ་གྱིས་མཚན་པར་བསམ་ལ། དེ་ནས་སྤྱི་བོར་ཨོཾ་ལས་འོད་འཕྲོས་པས་ལུས་ཀྱི་སྒྲིབ་པ་དག་ནས། ཕྱོགས་བཅུའི་སངས་རྒྱས་ཐམས་ཅད་ཀྱི་སྐུ་བསྡུས་ནས་དེར་ཐིམ་པ་ལ། སངས་རྒྱས་ཐམས་ཅད་ཀྱི་སྐུ་ཆེ་བར་བྱིན་གྱི་བརླབས་སོ། །དེ་བཞིན་དུ་གསུང་དང་ཐུགས་ཐམས་ཅད་དཔེ་འདྲེའོ། །དེ་ནས་སློབ་མ་ལྷར་གནས་པ་ལ་མཆོད་པར་བྱའོ། །དེ་ནས་ངག་ཏུ། ཁྱོད་དེ་བཞིན་གཤེགས་པ་ཐམས་ཅད་ཀྱི་སྐུ་ཆེ་བར་བྱིན་གྱི་བརླབས་པར་གྱུར་གྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་། མ་དད་པ་རྣམས་ལའང་མ་ཡིན་ནོ། །ཧཱུྃ་ཛ་ཧཱུྃ། ཞེས་བརྗོད། དེ་ནས་ལས་ཀྱི་སློབ་དཔོན་གྱིས་ནང་དུ་ཁྲིད་ལ་སློབ་དཔོན་ལ་གཏད་ལ། སློབ་དཔོན་གྱིས་ཁྲིད་ལ་དཀྱིལ་འཁོར་ལ་བསྐོར་བ་ལན་གསུམ་བྱས་ལ་
1-2-160b
དཀྱིལ་འཁོར་གྱི་ཤར་ནས་སྐུ་གསུང་ཐུགས་ཀྱི་ཕྱག་བྱ་བ་ནི། ཐལ་མོ་གནས་གསུམ་དུ་སྦྱར་ལ། ཨོཾ་ན་མ་ཏེ་ཧཱུྃ། ཨོཾ་ན་མ་མེ་ཧཱུྃ། ཨོཾ་ན་མོ་ན་མ་ཧཱུྃ། ཞེས་བརྗོད་ལ་ཕྱག་བྱ། ནང་དུ་ཞུགས་ལ་སློབ་དཔོན་དང་། ལྷ་ལ་སྐྱབས་སུ་འགྲོ་བ་ནི། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོར་བཅས་པ་དང་། །རྣལ་འབྱོར་གསང་སྔགས་མཁའ་འགྲོ་མ། །འཁོར་ལོ་གསུམ་གྱི་བདག་ཉིད་ཅན། །ཀུན་ལ་བདག་ཉིད་སྐྱབས་སུ་མཆི། །དེ་ནས་སློབ་དཔོན་གྱིས་ལྷ་ཚོགས་ལ་གསོལ་བ་གདབ་པ་ནི། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །དེ་ནས་དམ་ལ་བཞག་པ་ནི། སྤྱི་བོར་རྡོ་རྗེ་བཟུང་ལ་ངག་ཏུ། དེང་ཁྱོད་དེ་བཞིན་གཤེགས་པ་ཐམས་ཅད་དང་། དཔའ་བོ་དང་རྣལ་འབྱོར་མ་ཐམས་ཅད་ཀྱི་རིགས་སུ་སྐྱེས་ཀྱི། ངས་ཁྱོད་ལ་དཔལ་ཧེ་རུ་ཀའི་དམ་ཚིག་བརྗོད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་དང་། རྣལ་འབྱོར་མ་རྣམས་ཀྱི་དངོས་གྲུབ་ཀྱང་ཐོབ་པར་འགྱུར་ན༑ དངོས་གྲུབ་གཞན་ལྟ་ཅི་སྨོས། ཁྱོད་ཀྱིས་དཀྱིལ་འཁོར་ཆེན་མོ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། སྨྲས་ན་དམ་ཚིག་ཉམས་པར་གྱུར་ཏ་རེ་གཞན་ལ་སྨྲས་ན་དམ་ཚིག་ཉམས་སོ། །ཞེས་བརྗོད་
1-2-161a
༄༅། །དོ། །དེ་ནས་ཉེས་དམིགས་ཀྱི་སྒོ་ནས་དམ་ལ་བཞག་པ་ནི། ཧེ་རུ་ཀ་དཔལ་དེང་ཁྱོད་ཀྱིས། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། ཞེས་བརྗོད་དོ། །དེ་ནས་ཡེ་ཤེས་དབབ་པར་གསོལ་བ་གདབ་པ་ནི། བདུད་རྩིའི་བྱུགས་པ་བྱས་པའི་དཀྱིལ་འཁོར་གྱི་སྟེང་ནས་བླ་མ་ལ་ཕྱག་བྱས་ལ། ངག་ཏུ། བླ་མ་ཧེ་རུ་ཀར་བཅས་པ་དང་། དཔའ་བོ་དང་རྣལ་འབྱོར་མ་རྣམས་ཀྱིས་བདག་ལ་བྱིན་གྱིས་བརླབ་ཅིང་། བདག་ལ་དཔའ་བོ་དང་རྣལ་འབྱོར་མ་རྣམས་ཀྱི་ཡེ་ཤེས་ཕོབ་ཅིག །ཅེས་གསོལ་བ་དྲག་ཏུ་གདབ་བོ། །དེ་ནས་སློབ་མ་ཞབས་དང་ཕྱག་འཁྱུད་པའི་ཕྱག་རྒྱ་བཅས་ལ། སློབ་མ་ཧེ་རུ་ཀ་ཡབ་ཡུམ་དུ་བསྒོམས་ལ། རྩ་གསུམ་འཁོར་ལོ་གསལ་གདབ་སྟེ། ལྟེ་བའི་ཨ་ལས་མེ་སྦར་བས་སྙིང་གའི་ཧཱུྃ་དང་། མགྲིན་པའི་ཨཿབསྲེགས། དེ་ནས་ཧཾ་ལ་ཕོག་པས་བདུད་རྩི་བྱུང་། ལུས་ཐམས་ཅད་ཟག་པ་མེད་པའི་བདེ་བ་སྐྱེས་པར་བསམས་ལ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདེ་མཆོག་གི་ལྷའི་རྣམ་པར་ལུས་ལ་ཐིམ་པས་བདེ་མོར་ཡོད་པར་བསམ་ལ། སློབ་དཔོན་གྱིས་ངག་ཏུ། ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ་ཛྙཱ་ན་ཨ་བེ་ཤ་ཡ་ཨཱ་ཨ་ཧྲི་བཾ་སྭཱ་ཧཱ། ཞེས་དྲག་ཏུ་བརྗོད་པས། སྐུ་ལ་བབས་ན་འཕར། གསུང་ལ་བབས་ན་སྔགས། ཐུགས་ལ་བབས་ན་མི་རྟོག་པ་
1-2-161b
འཆར་རོ། །དེ་ནས་མེ་ཏོག་དོར་ཞིང་། སློབ་དཔོན་གྱིས་ངག་ཏུ། ཕོ་བྲང་འདིའི་དབུས་ན་བདེ་མཆོག་ལྷ་ལྔ་བཞུགས་པ་ལ་གཙོ་བོ་ལ་མེ་ཏོག་ཕྲེང་བ་ཕུལ་བར་སོམས་ལ། པྲ་ཏིཙྪ་བཛྲ་ཧོ༔ ཞེས་མེ་ཏོག་དོར་དུ་གཞུག་གོ །རིགས་ལྔ་ལ་དྲིས་པའི་མིང་། མི་བསྐྱོད་རྡོ་རྗེ་ལ་སོགས་པ་གདགས་སོ། །ཕྲེང་བ་གཏད་པ་ནི། སེམས་དཔའ་སྟོབ་ཆེན་ཁྱོད་ཀྱིས་ནི། །དེ་ནི་བདག་ཏུ་བཅངས་བར་བྱ། །པྲ་ཏི་གྲྀཧྞ་སཏྭ་མ་ཧཱ་བ་ལ། ཞེས་པས་སློབ་མའི་སྤྱི་བོར་བཞག །དེ་ནས། ཨོཾ་བཛྲ་ཙཀྵུ་ཧཱུྃ། ཞེས་སྤྱན་དབྱེའོ། །དེ་ནས་དཀྱིལ་འཁོར་དང་སློབ་དཔོན་དང་ལྷ་ལ་ལྟ་ཞིང་ཕྱག་བྱའོ། །དེ་ནས་མཎྜལ་ཕུལ་ལ་དབང་བསྐུར་བར་གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཅིང་གསོལ་བ་ལྟར། །བདག་ཀྱང་སྐྱོབ་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །ཞེས་ལན་གསུམ་གསོལ་བ་གདབ་བོ། །དེ་ནས་སློབ་མ་ལྷར་བསྐྱེད། རིགས་ལྔའི་ཐུགས་ཀ་ནས་ལྷ་མོ་ལྔས་ཕྱག་ན་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་བཀང་བ་ཐོགས་པ་རྣམས་ཀྱིས་དབང་བསྐུར་བར་བསམ། རིགས་ལྔའི་བྱིན་རླབས་བྱེད། ཁྲོ་བོ་རྣམས་ཀྱིས་བགེགས་བསྐྲད་དོ། །བྱང་ཆུབ་སེམས་དཔའ་རྣམས་ཀྱིས་བཀྲ་ཤིས་བརྗོད་དོ། །ལྷ་མོ་རྣམས་ཀྱིས་མཆོད་པར་བསམ་མོ། །སློབ་དཔོན་གྱིས་ངག་ཏུ། སངས་རྒྱས་རྣམས་ནི་ཐམས་ཅད་ཀྱི། །གསང་
1-2-162a
༄༅། །གསུམ་གནས་ལས་བྱུང་བ་ཡི། །ཁམས་གསུམ་པ་ཡིས་ཕྱག་བྱས་པ། །རྡོ་རྗེའི་དབང་བསྐུར་ཆེན་པོ་སྦྱིན། །ཨོཾ་ཧྲི་ཧ་ཧ་ཧཱུྃ་ཧཱུྃ་ཕཊ། ཨོཾ་བཛྲ་ཨ་བྷི་ཥིཉྩམཾ། ཨོཾ་རཏྣ་ཨ་བྷི་ཥིཉྩམཾ། ཨོཾ་པདྨ་ཨ་བྷི་ཥིཉྩ་མཾ༑ ཨོཾ་ཀརྨ་ཨ་བྷི་ཥིཉྩམཾ། ཨོཾ་བུདྡྷ་ཨ་བྷི་ཥིཉྩམཾ། ཞེས་བརྗོད་ཅིང་དབང་བསྐུར་རོ། །དེ་ནས་དུག་ལྔ་དག་ནས་ཡེ་ཤེས་ལྔ་ཐོབ་པར་བསམ་མོ། །ཆུའི་ལྷག་མ་ཡར་ལུད་པ་ལས་སྤྱི་བོར་མི་བསྐྱོད་པས་དབུ་རྒྱན་པར་བསྒོམ་མོ། །དེ་ནས་མཆོད་པ་ལྔས་མཆོད་དོ། །དེ་ནས་སྔགས་ལུང་ནི། སློབ་དཔོན་གྱི་ཕྲེང་བ་བདུད་རྩིས་བསངས་ལ། སྟོང་པའི་ངང་ལས་ཐོད་ཕྲེང་དུ་བསམ་ལ་ཡེ་ཤེས་པ་བསྟིམ། དབང་བསྐུར་ལ། གེ་བདུན་པ་བརྒྱ་རྩ་བརྒྱད་བགྲངས་ལ། སློབ་མས་མེ་ཏོག་ཕུལ། སློབ་དཔོན་གྱིས་ལྷ་ལ་གསོལ་བ་བཏབ་པ་ནི། བཅོམ་ལྡན་འདི་ལ་གནང་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་ལན་གསུམ་བྱ། དེ་ནས་སྔགས་ཀྱི་རྗེས་བཟློས་ལན་གསུམ་བྱ། དེ་ནས་སློབ་མའི་སྙིང་གར་མེ་ཏོག་བཟུང་ལ་ཐལ་མོ་སྦྱར་ནས་ངག་ཏུ། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་བྱིན་གྱིས་བརླབ་ཏུ་གསོལ༑ ༑ཞེས་ལན་གསུམ་གསོལ་བ་གདབ་བོ། །སྔགས་ཀྱི་དབང་ངོ་། །དེ་ནས་སློབ་མ་རྡོ་རྗེ་སེམས་དཔར་བསྒོམ་ལ། འདི་ནི་སངས་རྒྱས་ཐམས་ཅད་ཀྱི། །དཔལ་ཧེ་རུ་ཀའི་ཕྱག་ན་བསྣམས། ཁྱོད་ཀྱིས་
1-2-162b
ཀྱང་ནི་རྟག་དུ་བཅངས། །དཔལ་ཧེ་རུ་ཀའི་བརྟུལ་ཞུགས་བརྟན། །ཨོཾ་བཛྲ་སརྦ་ཏ་ཐཱ་ག་ཏ་སིདྡྷི་ཧ་ཧ་ཧེ་ཧེ་ཧཱུཾ། རྡོ་རྗེ་སློབ་མའི་ཐུགས་ཀར་བཟུང་ངོ་། །བརྟུལ་ཞུགས་སོ། །དེ་ནས་རྡོ་རྗེ་སློབ་དཔོན་གྱི་དབང་ནི། མཎྜལ་ཕུལ་ལ་གསོལ་བ་གདབ་པ་ནི། ཕྱིར་མི་ལྡོག་པའི་དབང་བསྐུར་ཆེ། །དཔའ་བོ་ཆེན་པོ་བདག་ལ་གསོལ། །འགྲོ་བ་མཚན་མ་མེད་བྱེད་པ། །དེ་ནི་དེང་འདིར་བརྩལ་དུ་གསོལ། །ཅེས་གསོལ་བ་བཏབ་ལ༑ ལག་པ་གཡས་པར་རྡོ་རྗེ་བྱིན་ལ། ཐུགས་ཀྱི་དམ་ཚིག །གཡོན་པར་དྲིལ་བུ་བྱིན་ལ། གསུང་གི་དམ་ཚིག །རང་དམ་ཚིག་སེམས་དཔར་བསྒོམ་པ་ནི་ལྷའི་དམ་ཚིག་གོ །རྡོ་རྗེ་ཆེ་དང་དྲིལ་བུ་ཆེ། །བཟུང་གཅིག་རྡོ་རྗེ་བྱིན་གྱིས་བརླབས། །དེ་རིང་རྡོ་རྗེ་སློབ་དཔོན་འགྱུར། །སློབ་མའི་ཚོགས་ནི་བསྡུ་བར་གྱིས། །དེ་བཞིན་གཤེགས་པ་རྣམས་ཀྱིས་བུམ་པའི་དབང་བསྐུར་བར་བསམ་ཞིང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡི། །དག་པ་ཡིས་ནི་སྐུ་ཁྲུས་གསོལ། །ན་མསྶརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བརྗོད་ཅིང་དབང་བསྐུར་བས་ལུས་ངག་ཡིད་གསུམ་གྱི་དྲི་མ་དག་ནས་ཆུའི་ལྷག་མ་གྱེན་དུ་ལོག་པས། རྡོ་རྗེ་སེམས་དཔས་དབུ་རྒྱན་པར་བསམ་མོ། །ཀྱེ་ཆེ་གེ་མོ་བྱ་བ་ཁྱོད་ཀྱིས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་སློབ་དཔོན་
1-2-163a
༄༅། །གྱིས་ཤིག་ཅེས་བརྗོད། སློབ་དཔོན་གྱི་རྗེས་གནང་ངོ་། །དེ་ནས་ཧེ་རུ་ཀར་བསྒོམས་ལ། དེང་ནས་བརྩམས་ཏེ་བུ་ཁྱོད་ཀྱིས། །གཟུགས་སྒྲ་དྲི་རོ་རེག་ལ་སོགས། །འདོད་ཡོན་ལྔ་ལ་སྤྱོད་པར་གྱིས་༑ ༑ལྷ་མཆོད་པའོ། །དེང་ནས་བཟུང་སྟེ་བུ་ཁྱོད་ཀྱིས། །ལུས་དང་སྲོག་ལ་མི་ལྟ་བར། །རྟེན་ཅིང་འབྲེལ་པར་འབྱུང་བའི་ཆོས། །འགྲོ་བའི་དོན་ནི་དཔག་མེད་བྱོས། །འགྲོ་དོན་གྱིས་ཞེས་སོ། །དེ་ནས་༩ དཀྱིལ་འཁོར་བསྟན་པ་ནི་ངག་ཏུ། ཐར་པ་ཆེན་པོའི་ཕོ་བྲང་རྣམ་པར་སྣང་མཛད་ཀྱི་རང་བཞིན། རིན་པོ་ཆེ་སྣ་ཚོགས་ལས་གྲུབ་པའི་གྲུ་བཞི་རྟ་བབས་དུར་ཁྲོད་རྡོ་རྗེ་མེ་རི་དང་བཅས་པ་འདི་རང་གི་སེམས་ཀྱི་དཀྱིལ་འཁོར་ཡིན་ལ། སེམས་ཉིད་ཀྱི་རྟོག་པ་མི་འདྲ་བ་ལ་བྱང་ཆུབ་ཀྱི་ཆོས་སུམ་བཅུ་རྩ་བདུན་ཤར་ལ། དེ་མཚོན་པའི་བརྡ་ལ་དཀྱིལ་འཁོར་གྱི་སྒོ་དང་རྒྱན་ལ་སོགས་པར་སྣང་ངོ་། །དཀྱིལ་འཁོར་གྱི་དེ་ཁོ་ན་ཉིད་དོ། །དེ་ཡང་སེམས་ཉིད་ཕུང་པོ་ཁམས་དང་སྐྱེ་མཆེད་དུ་ཤར་ལ། དེའི་རང་བཞིན་བཅོམ་ལྡན་འདས་འཁོར་ལོ་བདེ་མཆོག །སྟོང་པ་དང་སྙིང་རྗེ་དབྱེར་མེད་རྡོ་རྗེ་འཆང་ཤར་བའོ། །དེའི་གསལ་སྣང་མ་དག་པ་ལ་སོགས་པ་ལ་དྲི་མ་བཞི་ལ་སོགས་པ་ཤར་བའོ། །འཁོར་ལོ་ལ་རྡུལ་ཚོན་གྱི་དཀྱིལ་འཁོར་མཐོང་། དབང་ལ་བུམ་དབང་། དྲི་མ་མ་ལུས་ཀྱི་དྲི་མ་དག །བསྐྱེད་པའི་རིམ་པ་བསྒོམ་པ་ལ་དབང་། 
1-2-163b
འབྲས་བུ་སྤྲུལ་པའི་སྐུ་ཐོབ། དེས་ནི་བུམ་དབང་ཐོབ་པ་ཡིན་ནོ། །དེ་ན་གསང་དབང་ཐོབ་པར་བྱ་བའི་ཕྱིར་མཎྜལ་ཕུལ་ལ་གསོལ་བ་གདབ་པ་ནི། བྱང་ཆུབ་རྡོ་རྗེ་སངས་རྒྱས་ལ། །ཅི་ལྟར་མཆོད་ཅིང་གསོལ་བ་ལྟར། །བདག་ཀྱང་སྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །ཅེས་གསོལ་བ་བཏབ་ལ། ༼ཀ༽ བྷ་གའི་དཀྱིལ་འཁོར་མ་མཐོང་བའི་བརྡར་སྤྱན་དར་བཅིངས་ལ། དེ་ནས་སློབ་དཔོན་ལྷན་ཅིག་སྐྱེས་པ་ཡབ་ཡུམ་གྱི་ང་རྒྱལ་གྱིས་སྙོམས་པར་ཞུགས་པས་དགའ་བ་བཞི་ཉམས་སུ་མྱོང་། བྱང་ཆུབ་ཀྱི་སེམས་ཀུན་ད་ལྟ་བུ་རྡོ་རྗེའི་ལམ་ནས་ཐོན་ཏེ། ཐོད་པའི་ཆང་ནང་དུ་བབས་པར་དཔོན་སློབ་གཉིས་ཀས་བསམ་ལ། དངོས་སུ་བདུད་རྩིའི་རིལ་བུ་སྦྲང་རྩི་ལ་སོགས་པ་དང་སྦྱར་ཏེ་བྱིན་ལ། ངག་ཏུ། ཅི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་དབང་བསྐུར་བ་ལྟར། །བདག་གི་གསང་བའི་སེམས་ཀྱིས་ནི། །སེམས་ཀྱི་རྒྱུན་གྱིས་དབང་བསྐུར་རོ། །ཞེས་བརྗོད་ལ་སྦྱིན་ནོ། །དེ་ནས་མདུན་གྱི་ལྷན་སྐྱེས་ཡབ་ཡུམ་སྣང་བ་མཐའ་ཡས་ཀྱི་ངོ་བོར་གྱུར་པས། སློབ་མའི་མགྲིན་པར་ཐིམ། རང་བཞིན་བརྒྱད་བཅུའི་རྟོག་པ་འགགས་པར་བསམ་མོ། །དེ་ལ་པཱུ་ཛ་ལྔ་འབུལ་གདོང་དར་ཕྱེ། དཀྱིལ་འཁོར་ལ་བྷ་གའི་དཀྱིལ་འཁོར་མཐོང་། གསང་བའི་དབང་ཐོབ། ངག་གི་དྲི་མ་དག །བསྒོམ་བྱ་རྩ་རླུང་བསྒོམ་པ་ལ་དབང་། 
1-2-164a
༄༅། །འབྲས་བུ་ལོངས་སྐུ་ཐོབ་པོ། །དེ་ནས་ཤེས་རབ་ཡེ་ཤེས་ཀྱི་དབང་ཐོབ་པར་བྱ་བའི་དོན་དུ། མཎྜལ་ཕུལ་ལ་གསོལ་བ་གདབ་པ་ནི། བཅོམ་ལྡན་ཞི་བ་ཆེན་པོ་ཀྱེ། །རྡོ་རྗེ་རྣལ་འབྱོར་ཅི་བཞེད་པ། །མི་ཕྱེད་ཕྱག་རྒྱ་བསྒྲུབ་པ་པོ། །རྡོ་རྗེ་རྣལ་འབྱོར་ལས་བྱུང་པའི། །ཅི་ལྟར་ཁྱོད་ནི་བདག་ཉིད་ཆེ། །མངའ་བདག་བདག་ལའང་དེ་ལྟར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་པ་སྐྱབ་མེད་བདག་ལ་སྐྱོབས༑ ༑ཤེས་ལན་གསུམ་གསོལ་བ་གདབ། ༼ཁ༽ ཀུན་རྫོབ་བྱང་ཆུབ་སེམས་ཀྱི་རང་བཞིན་དཀྱིལ་འཁོར་མ་མཐོང་བའི་བརྡར་སྤྱན་དར་བཀབ་ལ། སློབ་དཔོན་གྱིས་འདི་ལྟར་བསྒོམས་ཏེ། སློབ་དཔོན་གྱི་ཡུམ་ལས་རྡོ་རྗེ་ཕག་མོ་རེ་རེ་སྤྲོས་ནས་ཕྱག་རྒྱ་གཏད་པ་ནི། རང་གི་ངོ་བོ་རྡོ་རྗེ་ཕག་མོ་ཡིན་ཡང་། རྣམ་པ་རང་གི་ཡིད་ལ་དགའ་བའི་མིའི་བུ་མོ་གཟུགས་བཟང་ཞིང་ཤ་རྩ་དམར་སེར་ལང་ཚོ་དང་ལྡན་པ་ཞིག་བདག་གིས་ཁྱེད་རྣམས་ཀྱི་ལག་ཏུ་གཏད་པར་བསྒོམས། དེ་ནས་བླ་མས་ངག་ཏུ། དགའ་སྟེར་གནས་སྟེར་ལྷ་མོ་ནི། །སྣ་ཚོགས་གཟུགས་ཅན་ཡིད་འོང་མ། །ཁྱེར་གཅིག་ཁྱེར་གཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །ཞེས་བརྗོད་ལ། ཕག་མོ་དེའི་ཕྱག་གཡོན་སློབ་མའི་ལག་པ་གཡས་པར་གཏད་པར་བསམ། དེ་ནས་མཁའ་གསང་བྱིན་གྱིས་བརླབས་ལ་སྙམས་པར་ཞུགས་ཏེ། དགའ་བ་བཞིའི་ཉམས་
1-2-164b
མྱོང་སློབ་མའི་རྒྱུད་ལ་སྐྱེས་པར་བསམ་ཞིང་སྟེང་འོག་གི་རླུང་མནན་ལ། ཁ་སྦྱོར་བསྒོམས་པས་ལུས་བདེ་སྟོང་གིས་གང་བར་བསམས་ལ། ལུས་སེམས་ཁོང་ཀློད་ལ་བཞག་གོ །དེ་ནས་གཟུང་འཛིན་གྱི་རྣམ་རྟོག་ཐམས་ཅད་འགགས་ནས། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོར་བདེ་སྟོང་དབྱེར་མེད་པར་བསམ་མོ། །དེ་ནས་པཱུ་ཛ་ལྔས་མཆོད། གདོང་དར་ཕྱེ་ལ་བཤད་པ་ནི། དཀྱིལ་འཁོར་ལས་ཀུན་རྫོབ་བྱང་ཆུབ་ཀྱི་སེམས་མཐོང་། ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །རང་འོད་ཀྱི་རིག་མ་བསྟེན་པ་ལ་དབང་། འབྲས་བུ་ཆོས་སྐུ་ཐོབ་པོ། །བཞི་པ་ཚིག་དབང་ཐོབ་པར་བྱ་བའི་ཕྱིར། མཎྜལ་ཕུལ་ལ་གསོལ་བ་བཏབ་པ་ནི། ཁྱོད་ཞབས་པདྨའི་བཀའ་དྲིན་གྱིས། །གཙོ་བོའི་དབང་བསྐུར་རྣམ་གསུམ་ཐོབ། །དེ་རིང་རིན་ཆེན་བཞི་པ་ཡང་། །བཀའ་དྲིན་གྱིས་ནི་སྐྱབ་ཏུ་གསོལ། །ཞེས་ལན་གསུམ་གསོལ་བ་བཏབ༑ དོན་དམ་བྱང་ཆུབ་སེམས་ཀྱི་དཀྱིལ་འཁོར་མ་མཐོང་བའི་བརྡར་གདོང་དར་བཅིངས། དེ་ནས་བླ་མ་ཡབ་ཡུམ་ཧེ་རུ་ཀའི་རྣམ་པར་གྱུར་ནས། སྨིན་མཚམས་ནས་ཞུགས་ལུས་བདེ་བ་དང་སྟོང་པར་བསམ༑ སློབ་དཔོན་གྱིས་ངག་ཏུ། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་སྙིང་པོ་མཁའ་དང་མཚུངས། །རྡུལ་བྲལ་མཐར་ཕྱིན་ཞི་བ་ཉིད། །ཁྱེད་རང་ཡང་ནི་དེ་ཡི་ཕ། །ཁྱོད་ཀྱི་ཕ་ནི་ཁྱོད་ཉིད་དོ། །ཞེས་བརྗོད་
1-2-165a
༄༅། །ལ། དེའི་དོན་ནི་དབང་གསུམ་པའི་ཉམས་མྱོང་དོན་དམ་སེམས་ཀྱི་ཆོས་ཉིད། སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་དང་གསུམ་རོ་གཅིག་དབྱེར་མེད་དུ་ལྷོད་ཀྱིས་ཀློད་ལ་བཞག་གོ །དེ་རྟོགས་ནས་ལྷན་ཅིག་སྐྱེས་པའི་ཡེ་ཤེས་ཚིག་དབང་རིན་པོ་ཆེ་ཐོབ་པ་ཡིན་ནོ། །པཱུ་ཛ་ལྔ་འབུལ། གདོང་ཕྱེ་ལ་དཀྱིལ་འཁོར་བསྟན། དཀྱིལ་འཁོར་ལ་དམ་ཚིག་དཀྱིལ་འཁོར་མཐོང་ཚིག་དབང་ཐོབ། ལུས་ངག་ཡིད་གསུམ་གྱི་དྲི་མ་དག །ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་ཀྱི་སྐུ་ཐོབ་པོ། །དེ་ནས་བླ་མ་ལ་ཅི་འབྱོར་པའི་ཡོན་འབུལ་ལོ། །ཚོགས་བྱིན་གྱིས་རླབས་ལ་ཚོགས་ཕུད་གཏོར་མར་ཡུལ་ལ་གཏོར་མ་བསྔོའོ། །ཚོགས་དྲངས་ལ་ལོངས་སྤྱོད། ལྷག་མ་བསྡུས་ལ་བཏང་ངོ་། །དཀྱིལ་འཁོར་གྱི་རྗེས་མི་མངོན་པར་བྱའོ། །དེ་ནས། ཨོཾ་ཨཱཿཧཱུྃ་གིས་སློབ་མ་རྣམས་ཀྱི་བར་ཆད་བསྲུང་། རང་རང་གི་གནས་སུ་གཤེགས་སུ་གསོལ། བཅོམ་ལྡན་འདས་བདེ་མཆོག་ལྷ་ལྔའི་དབང་གི་ཆོ་ག་རྫོགས་སོ།། །།


目录
བདེ་མཆོག་ལྷ་ལྔའི་དབང་གི་ཆོ་ག་ནོར་བུའི་ཕྲེང་བ་བཞུགས་སོ། །